08.08.08, 17:47 Soo, "scho" min zweite Tag in Australie wo zend goht! Han mi scho ueberaschend guet iglebt, leider bin i aber au huet noed dezue cho, mis traute Heim, dae Wohnwage zfotografiere (han i mir gescht scho vorgnoh) .. Doerfer und Staedt gsehnd do minere Meinig no alli praktisch identisch us (huet han i noed emol Mullumbimby erkannt, wo mir zruggcho sind, obwohl i do eigentlich wohn*schaem*), was beduetet, dass i mi wohrschindlich scho uf minere erschte Fahrt mit dae Mona erem alte Auto wird verirre=)..bis jetzt bin i ebe amel mit ere chli umegfahre, drum au immer wieder heicho! Huet sind mir zum Bispiel zum oestlichschte Punkt vo Australie (en Luechtturm in Byron Bay) gwanderet. Isch en wunderbare Wald gsi und het tolli Straend dae ganze Kueste no .. Leider han i scho am zweite Tag mini Kamera vergesse und chan eu das ganze nonoed zeige .. aber kei angscht: i mach das tuerli nomel, dasmol mit kamera, und denn chan i eu au ae foti vom luschitge Buschtruthahn zeige wo doet wohnt:-) Bis bald, ihr Liebe!  13.08.08 19:19 Wie es paar vo eu viellicht scho erfahre hend, han i gescht di brilliant Idee gha am Morge frueh (gnauer: 5.45) dae noegscht huegel uezchlettere und dae sunneufgang zverfolge! Ueberaschenderwies han is gschafft 1. mi um die Uhrziit us em Bett zquaele 2. mini Kamera mitzneh.. Di weniger agnehm Ueberaschig isch denn aber dae toetlich Iiswind gsi und d'Tatsach, dass dae australisch Sunneufgang erscht am 6.30 stattfindet (was beduetet, dass i 3/4tel Stund schlotternd uf dem Huegel ghockt bin und uf dae Sunneufgang gwartet han:-))  20.08.08 Gescht han i zum zweite Mol dae Byron Bay Lighthouse Walk gmacht, da wunderbare Wandertuerli dur dae Wald zum Luechtturm!! Isch total schoen gsi, i bin begeischteret vo dae australische Flora und Fauna:-) aber lueged doch selber (->Bilder) Und huet bin i scho wieder in Byron Bay gsi (s'zieht mi irgendwie immer wieder doet ane..) mit em Ziel ae gueti Usrueschtig fuer mini baldig Reis in Norde zpoeschtele.. Ergebnis: Bin jetzt im Bsitz vomene (erscht im Nochhinein bemerkt) Chinderschlofsack*g* und emene zchliine Rucksack, wo i (ebefalls erscht im Nochhinein bemerkt) min Schlofsack noed chan befeschtige:-).. Also wird i morn wohl oder uebel eimol meh uf Byron Bay fahre und dae ganz Seich umtusche!.. ->Eigentlich het i eu gern chli meh Bilder zu dae Luechtturm-Wanderig zeigt, jedoch tuet d'Homepage gad chli bloed und i chan im Moment kei neui Bilder meh drufftue:-( 22.08.08 I han wunderbari Neuigkeite zverkuende: Mini Reis in Norde isch buecht:-)!!!*froi* Am 1. September gohts los! Zerscht fahr i mit em Bus vo Byron Bay dae Kueste no bis uf Cairns.. s'Tolle isch dass i noed eifach 2 Taeg muen duerefahre sondern Zwueschehalt chan mache wo i will (muens aber en Tag vorher dae Busgsellschaft melde) .. Mini Zwueschehaelt (Noosa, Hervey Bay und Fraser Island, Airlie Beach, Townsville und zum Schluss Cairns) han i probiert uf dae folgende Charte izeichne!! Leider sind noed alli Ort uf dae Charte.. und da bloedae Photoshop-Programm het mi halbe in Wahnsinn triebe, drum au nur maessig schoen izeichnet:-) Plant han i fuer die Zwueschestoep eigentlich nonoed wuerklich viel, i loh mi denn vor Ort ueberasche! Wa i aber vorhan isch: Mit em Boot go Wal aluege in Hervey Bay, und im Great Barrier Reef go schnorchle und is Naturschutzgebiet in Cairns! Denn gohts am 23. September witer: Flug vo Cairns uf Darwin! Doet han i vor sowohl dae Litchfield National Park als au dae Kakadu National Park go besichtige und Darwin selber chli z'erkunde.. Am 2. Oktober flueg i denn wieder zrugg uf Brisbane! (meh oder weniger) wichtigi Amerkig: Waehrend em Reise wird i nueme so viel en Computer zur Verfuegig ha wie do, drum noed erwarte, dass e-Mail immer no so blitzartig beantwortet werded wie jetzt*g*  03.09.08 I jetzt gad vor es paar Stuendli do in Rainbow Beach acho und han also min erschte Stop Noosa Heads scho wieder hinder mir loh..  Bin i eigentlich gar noed mol so trurig drueber, weil i doch echli meh vo  Noosa erwartet han, als denn schlussendlich dae Fall gsi isch!  Mir isch da im Vorhinein als gmuetliche, alternative Ort beschriebe worde .. Wo i denn acho bin isch mir zerscht mol s'ueberaschend hoche Durchschnittsalter ufgfalle (Seniore so weit das Auge reicht:-S) und smeischte wo under 60gi gsi isch, sind Familie mit erne Chind gsi..  Das ganze isch also sehr touristisch gsi, anstatt uf ae huebsches Hippie-doerfli bin i uf uebertuerti Shoppingstrosse gstosse..  I dae Jugendherberge (Pluspuenkt uebrigens fuer dJugendherberge, die isch echt schoen gsi!!) han i denn schlussendlich doch no Luet i mim Alter kenneglernt.. Und huet Morge isch es denn ebe witer gange noch Rainbow Beach!! Vo do us wird i denn morn uf Fraser Island fahre und doet 3 Taeg mit enere Gruppe vo anderne Backpacker (guet i wuerd mi selber jo eher noed als waschechte Backpacker bezeichne*g*) mit em Jeep d'Insle erkundige!! Bin scho ganz gspannt uf d'Insle und uf min Gruppe:-)!! 06.09.08 Zrugg vo Fraser Island=)!! ..Het mini Erwartige noed ganz choene erfuelle, die guet Insle*g* alli wo i bis jetzt troffe han wo scho doet gsi sind hend gseit da seg was vom Schoenschte wos in Australie gseh hend, aber vo mir chan i da glaubs noed ganz behaupte:-S Am erschte Tag hets vom Morge bis am Obet dueregregnet, dae Gruppezemehalt isch maessig gsi und obwohl Fraser Island als Insle vo dae Dingos bekannt isch hend mir kein einzige gseh.. Jedoch mol ae ganz neui Erfahrig gsi (drue Taeg im Regewald und im Sand ohni eimol choene dusche .. no nie isch mir ae Jugendherberge luxurioeser vorcho*g*) und wird mir sicher no ae Wiili in Erinnerig bliebe!! ..Morn gohts witer uf Hervey Bay und doet verwiil i denn fuer 3 Taeg (froi mi scho sehr uf s'Whale Watching!!)  Also bis bald, mini Liebe, i halt eu witer uf em laufende!! 09.09.08 Scho min dritte Tag in Hervey Bay goht z'End und es wird wohl langsam Ziit dass i eu mol chli was vo dem Ort und mine Erlebnis do brichte: Min erschte Idruck vo Hervey Bay wuerd i eher als .. mhh.. verwirrend bezeichne:-) (->dae Bus het mi mitte im Industrie-Gebiet vo Hervey Bay ablgade und voellig orientierigslos (es isch Suntig gsi -> alli Laede sind zue gsi -> han niemert choene noch em Weg froge) wie i gsi bin isch es noed emol ae halb Stund gange und scho han i mi hoffnigslos verirrt*g* ..Han denn i minere Not muese ae Taxi bstelle wo mi zunere Jugendherberge gfahre het ..*schaem*) Wo i denn also endlich en Ort zum schlofe gfunde han, han i zu minere Ueberaschig muese feststelle, dass i ae 5er-Zimmer ganz fuer mi elai han!  Zerscht het mir dae Gedanke, 4 Taeg inere praktisch leere Jugendherberge zverbringe noed so zuegseit, aber scho noch churzer Ziit han i total dae Gfalle dran gfunde:-)! Es isch richtig schoen gsi jetzt mol ae paar Taeg chli fuer mi zsi und au mol ae Zimmer fuer sich zha (vor allem noch dene 3 Taeg Fraser Island, wo i eifach kei Sekunde elai gsi bin) ..  Ouh jo und huet isch au no s'Whale Watching gsi!! Und da het sich total glohnt*begeisteret* Dae ganz Tag sind mir uf emene Segelboot uf dae Suechi noch Wal gsi und noch es paar Stunde hend sich denn zwei gselligi Buggelwal zu ues gsellt (nur 1 - 2 Meter vom Boot entfernt) und sind ca. 3/4tel-Stund bi ues umeplantscht!(<-sind voll verspielt gsi, hend immer chlini "Kunststueckli" gmacht, han gar noed recht choene glaube, dass wuerklich wildi Tier sind!!)  Au d'Delfin und d'Meeresschildchrot hend mi sehr choene fuer sich begeischtere:-) ..Morn Obet gohts denn mit em Nachtbus witer zum 17-Bus-Stunde entfernte Airlie Beach! Ihr werded denn scho bald wieder vo mir ghoere!:-) P.S. Wuerd eu total gern d'Fotene vo dae Wal zeige, aber waehrend em Reise goht da leider noed:-(.. 11.09.08 Noch enere praktisch schloflose 13-stuendige (es sind denn doch "nur" 13 und noed 17 gsi!) Busfahrt bin i huet Morge in Airlie Beach acho und bin (uf Empfehlig vomene wiisbaertige Australier*g*) is groeschte Backpacker Hostel wo i je gseh han izoge! .. wuerklich gigantisch, richtig dorfaehnlich:-S Und weil mir alli gseit hend i mues unbedingt d'Whitsunday-Segel-Tour mache, da seg super, han i au gad no en 2 Taeg und 2 Naecht Segel-Trip buecht!! I hoff jetzt mol dae (eher spontan) Entscheid zu dem Trip isch au en guete gsi:-) Morn Nomitag gohts los und am Suntig choemed mir denn wieder zrugg! Denn blieb i nomel 1 Nacht in Airlie Beach und gang denn am Maentig uf Townsville!  Also, wird eu scho bald brichte wie s'Segle so gsi isch*g* 14.09.08 Zrugg vo minere 2-Tages-Segel-Tour!!! Isch total spassig und schoen gsi!!:-) Sind am White Heaven Beach gsi, wo dae ganz Strand us durch und durch wissem Sand bestoht und ebe irgendwie (wenn is richtig verstande han*g*) gar kein richtige Sand sondern ganz fii vermalleni Kristall vo under dae Erde isch!! Toent beeidruckend, isch es au gsi:-)  Aber noed so beeidruckend wies Schnorchle!! Okey, schnell han i muese feststelle, dass i noed wuerklich dae Schnorchel-Meischter bin.. Han en ziemliche "Respekt" vor em Meer und sine Bewohner!! (Klartext: Wenn noed ae paar Meter nebet mir oeppert andersch schwimmt oder wenns Wasser so tuef isch dass i mit dae Taucherbrille noed bis an Grund gseh wird i doch recht panisch*g* ..hihi ouh jo, und zum wuerklich abetauche han i au nonoed gnueg Muet choene ufbringe:-)!)  Aber i gang jo denn nomel go schnorchle, im Great Barrier Reef denn aber und viellicht fuehl i mi denn jo scho chli sicherer*g* Bin aber trotzdem voellig hin und weg gsi vo all dene farbige Fisch und Koralle!! Bin mir wie imene Dokumentationsfilm vorcho, sowas han i bis jetzt echt erscht im Fernseh gseh!!  Morn isch denn au mini Ziit in Airlie Beach abgloffe und denn fahr i uf Townsville! Also bis bald, ihr Liebe!! 22.08.09 Ui, jetzt han i gad gmerkt, dass i jo scho sit emene ziemliche Wiili gar kein neue Itrag meh gmacht han:-S Ookey, i probier defuer jetzt alles zemezfasse, wa i so sit em 14. gmacht han: Also, i bin jo denn 3 Taeg in Townsville gsi.. Strubi, strubi Stadt gsi!!! (Noed ganz so strub wie Nimbin, aber doch gnueg strub fuer min Gschmack*g*) Am Tag isch alles no recht normal gsi (ussert dass alli Hostels konsequent behauptet hend si seged usbuecht, au wenns da gar noed gsi sind*g*) und so ab em 9ni het sich die Stadt denn ploetzlich i ae Geisterstadt verwandlet..sogar dae McDonalds het am 9ni zuegmacht:-)!!  Weil mi Townsville selber ebe eher verstoert wie begeisteret het, han i denn en Usflug in botanische Garte und uf Magnetic Island gmacht:-)! Beides ae willkommeni grueni Abwechslig vom graue Stadtlebe gsi!! Denn isch es au scho wieder witer gange uf Cairns!! Do han i denn au min zweite Schnorchelversuech gstartet, damol im Great Barrier Reef und es isch total dae hammer gsi:-)!!! Han mi damol (im Gegesatz zum erschte Mol*g*) au voll wohl gfuehlt im Meer und sooo viel gseh: Riesefisch, wo usgsehnd wie Aquariumfisch, aber halt ebe riesig*g*, Roche, Schildchrot und (min Favorit) Nemo-Fischli:-)! Denn bin i mol en Tag chli in Cairns umegstrielet  (meh oder weniger Wichtigs zu Cairns: - weils do Ebbe und Fluet het, isch dae "Strand" am Tag alles pure Matsch und am Obet denn Wasser bis ad Promenade - im Wasser hets Krokodil, drum hets ae Lagune (i wuerd dem jetzt Badi sege, aber Lagune toent halt besser=)) zum Bade und mer doerf noed is Wasser - alli Laede sind uf Englisch und uf Japanisch agschriebe, weils do so viel Japaner het - waehrend dae letschte Moenet isch do ae Art Festival gsi wo aber am 20. verbi gsi isch und zum Schluss hends ae fascht endloses Fuerwerk verastaltet und en Markt und Musig..isch cool gsi=)) und am noegschte Tag uf ae Rainforest-Tour id Tablelands.. I het jo eigentlich total gern ae anderi Tour in Daintree gmacht, wo eim Aboriginies inere chliine Gruppe dur dae Wald fuehred, alles erklaered und wo mer au glernt het wie mer mit emene Speer en Fisch toedet:-) aber leiderleiderleider hends die Tour noed gmacht wo i do gsi bin, weil dae Fahrer chrank gsi isch und drum han i mi denn fuer ae Tour id Tablelands entschiede.. Vo doet muen i eu denn mol no ae Foti zeige, vo mir hinder em Millaa Millaa Wasserfall, da isch so mis Highlight vom Tag gsi, hinder en Wasserfall zchlettere:-)!! Joo, und jetzt isch denn mini Ziit do in Cairns au scho wieder abgloffe (waer gern no ein oder zwei Taeg laenger bliebe, aber Flug umbueche lit noed unbedingt i mim Budget*g*) morn flueg i naemlich scho uf Darwin!! Bin scho gspannt was doet so alles zgseh git und wird eu (damol hoffentlich chli fruehner) denn selbstverstaendlich alles brichte:-)!! 24.09.08 Ganz churze Itrag bevor mini Internet-Ziit wiedermol aglaufe isch: Bin do in Darwin acho (muen mi no chli an Klimawechsel gwoehne: immer ueber 30 grad und extremi Luftfuechtigkeit*keuch*=)) und blieb do bis am 2. Oktober! Huet troeff i mi mit zwei Duetsche wo i uf dae Whitsunday-Segeltour kenneglernt han, weil mir morn wohrschindlich zeme ae Auto mieted und denn fuer 3 Taeg in Kakadu National Park goend (find i total cool, weil i die Tourischtetoure langsam ziemlich satt han und so choend mir denn endlich mol selber entscheide wo mir anefahred und wie lang mir wo bliebed*juhuh*) Aber ebe, huet Obet muend mir da mol no bespreche und chli d'Choschte berechne usw und denn mol wieter luege!! Hoff aber, dass i eu am Suntig vomene abentuerliche 3-Tages-Usflug in Kakadu National Park chan brichte=)!! Bis ganz bald!! 27.09.08 Bin scho wieder zrugg us em Kakadu National Park!! Mir hend ues chli i dae Ziit verschaetzt=) Hend denkt mir bruched sicher drue Taeg aber noch zwei Taeg hend mir eigentlich scho alles gseh gha.. Wa moeglicherwies au dran liit dass mir chli "sfalsch" Auto gmietet hend fuer in en Nationalpark (en Toyota Yaris*g*) aber es isch voll billig gsi und seeehr komfortabel (also zum drin schlofe denn nueme ganz so komfortabel, aber zum fahre*g*).. Uf alli Faell hend mir denn halt die Strosse wo mer en 4WD brucht het, usloh!! Aber es isch au so sehr beidruckend gsi!! Wunderschoeni Landschafte, Kaenguruhs, Krokodil (jo, mir hend tatsaechlich ae Krokodil gseh:-o!!) und vieles mehr .. Jetzt bruched mir uesn coole Flitzer huet wohrschindlich no zum in staedtische Pool vo Darwin go (leider chan mer eimol meh noed am Strand go bade weg dae Qualle:-(..) weil mirs jo bis morn gmietet hend!! Muen eu denn unbedingt es paar Fotene vom Kakadu zeige wenn i wieder bi dae Mona bin!!!  18.10.08 Huh, i het choene schwoere dass min letschte Itrag weniger lang her isch:-S!! (I frog mi gad ob i viellicht mol en Itrag gmacht han wo i denn us Versehe gloescht han*mmh*) Okey, i probier jetzt so guet wies goht alles churz zemezfasse wa sit em 27. September so vor sich gange isch: Noch em Usflug in Kakadu Park han i zerscht no es paar Taeg mit dae Sylvia&dae Eva(<-mit ene han i ebe s'Auto gmietet gha) Darwin chli erkundet (ebe dae obe erwaehnt staedtisch Pool, Night Market wo mer under anderem Fleisch vo verschiedene australische Tier het choene esse (Wallaby isch Gsamtsieger und Opossum klare Gsamtverluerer vo allne Fleischsorte gsi:-)) und s'Openair-Kino vo Darwin mit Liegestuehl und riesige Chuessi, wo mer i dae Schwiz unbedingt au ifuehre soet*g*!!) D'Sylvia und d'Eva sind denn wieder abgreist und i han denn no es paar letschti Taegli in Darwin verbrocht und under anderem ae Tour in Litchfield National Park gmacht (->s'Foti vo dae Termitehuegel und vom us em Wasser springende Krokodil sind vo dere Tour) Joo, und denn isch es noch emene churze Schreckensmoment, wo i gmeint han i verwuetsch mis Flugzueg nueme weil i s'Ticket fuer dae Airport Shuttle Bus irgendwie verlore han, denn doch no zrugg uf Brisbane gange:-) Chum wieder zrugg in Mullumbimby bin i denn 3 Taeg zeme mit em Myka as Bellingen-Festival (<-chlises, aber sehr sympatisches Hippie-Festival ca. 3h suedlich vo do) go Pizzas verchaufe:-)!! .. Finanziell gseh isch da noed so en Erfolg gsi aber defuer het mir s'Festival gfalle!! Ouh jo und letscht Wuche han i no 3 Taeg in Brisbane verbrocht und han mi doet au nomel mit dae Sylvia troffe, wo am Obet wieder zrugg uf Duetschland gfloge isch!! Nochdem i jetzt in Brisbane mol so chli en erschte Idruck vo australische Grossstaedt uebercho han, bin i scho ganz gspannt uf Sidney und Melbourne und fang glaub au bald mol a mini Reis in Suede (Abreisedatum han i jetzt mol so provisorisch uf irgendwenn afangs November festgleit) chli zplane:-) Soo, macheds guet, ihr Liebe, i halt eu selbstverstaendlich witer uf em Laufende:-) 28.10.08 UUh, i han wunderbari Neuigkeite: Bald gohts uf di zweit Reis, damol uf ae "Reis in Suede"*FREU*:-D I bins jetzt scho sit emene Wiili am plane, aber jetzt han i definitiv alli Flueg und Bues buecht uuund .. hans sogar gschafft ae Auto zmiete damit i Tasmanie chan erkunde, obwohl i mit mine 19 Joehrli in Australie jo eigentlich no kei Auto chan miete*jubel*!!! Und wieder han i probiert eu mini Reiseroute uf enere Charte izeichne: (okey, da mit em Charte uf d'Homepage tue funktioniert im Moment offebar wieder mol noed .. drum tuen i si denn spoeter mol druff!!) Am 6. November goht min Flug uf Sydney, doet blieb i denn bis am 14. .. Denn gohts mit em Bus fuer 2 Taeg uf Canberra (doet mach i denn ae Velotuerli dur d'Stadt, offebar isch da sehr empfehlendswert:-)!!) und am 16. witer uf Melbourne, wieder mit em Bus.. In Melbourne verbring i 8 Taeg und am 24. November flueg i uf Hobart, Tasmanie!!!=) .. blieb zerscht chli in Hobart selber und han denn fuer 4 Taeg ae Auto gmietet zum d'Insle erkunde:-)!! Und am 2. Dezember gohts wieder zrugg zu dae Mona (wo i denn nur no ca. 2 Wuche bin .. ganz unwuerklich:-( ..) I hoff da Zueg mit dae Charte klappet mol no, denn choend ihr eu das Ganze chli besser vorstelle!! Send eu allne liebi Gruess id Schwiz!! 12.11.08 ..Und scho goht mini Ziit in Sydney langsam wieder z'End.. Schade, schade, mir hets do gfalle:-) Sehr viel interessants Zueg zum aluege, cooli Luet im Hostel, guets Wetter.. Huet han is au endlich mol gschafft, s'Opera House (richtig unwuerklich tatsaechlich amene Ort zstoh wo mer nur vo Charte und so kennt) azluege, bin i dae Art Gallery (di bescht wo i bis jetzt in Australie bsuecht han!!!*daumenhoch*) gsi und eimol meh im botanische Garte (haha, doet hets mi jetzt oefters anezoge*g*) ..  Hoff chan mi au fuer Canberra begeischtere=) Bis bald.. 21.11.08 Han mi fuer d'Stadt Canberra an sich noed wuerklich choene begeischtere .. Defuer um so meh fuer die toll Velotour wo i doet gmacht han:-D!!! .. Zwei Stunde gmuetlich um dae See gfahre, wunderschoen!!! (Wird denn mol es paar Bilder uf d'Homepage tue!) ..Han jetzt aber gad min Reiseplan recht churzfrischtig umgstellt und bin jetzt wieder sit zwei Taeg und bis am Maentig bi dae Mona, anstatt in Melbourne.. Am Maentig gohts denn aber glich uf Tasmanie!!! Froi mi scho sehr!!! 7.12.08 Huh, hans wieder chli versaeumt mit em Blog-schriebe, aber je noecher mini Abreis rueckt, desto meh han i s'Gfuehl, ach, i gseh jo eh bald alli wieder, chan jo denn alles verzelle, drum wird die Homepage im Moment scho fascht echli vernochlaessigt=) Tuen jetzt aber doch no vo Tasmanie brichte: Tasmanie isch eifach nur wuuunderschoen gsi!!! So unglaublich viel und unglaublich schoeni Plaetz und eifach null Tourischte, da isch s'bescht gsi:-)!! Sus han i mi amel muese mit 10 anderne vor en Wasserfall draenge, zum ae Foti mache und do bin i eifach elai gsi und hans voll choene gnuesse!!! D'Landschaft isch eifach nur beidruckend gsi und het all Halbstund wieder komplett andersch usgseh! Chan eu jetzt kei Bilder zeige, weil i alli Fotene mit sonere Plastik-Karton-Kamera gmacht han, wo mer nur eimol chan bruche und denn dFotene entwicklet*g* ..Isch wuerklich toll gsi und i bin soo froh, dass i ae Auto gmietet han und chli was vo dae Insle gseh han (bin vo Hobart im Suede ueber d'Westkueste ad Nordkueste gfahre und denn ziemlich durs Zentrum wieder uf Hobart zrugg) au wenn mer viel meh Ziit muest iplane zum wuerklich di ganz Insle zgseh!! ..Jetzt bin i sit letschtem Zischtig wieder do bi dae Mona und gang noegscht Wuchenend nomel fuer 4 Taeg uf Sydney, so mis absolute Abschlussreisli, und denn nomel ae Wuche do bi dae Mona UND DENN GOHTS SCHO WIEDER HEI!!!! i chans gar nonoed richtig fasse, dass i wuerklich sit 4 Moenet nueme dihei gsi bin und dass i scho i zwei Wuche alles do hinder mir loh und wieder zrugg gang..